ბრწყინვალე შვიდეულის სამშაბათს, 17 აპრილს, გორში, ტრადიციულად, "ოქონობის" სახალხო დღესასწაული აღინიშნება. როგორც "ინტერპრესნიუსს" გორის მუნიციპალიტეტის პრესსამსახურიდან აცნობეს, "ოქონობაზე" ჩვეულებისამებრ მრავალი ღონისძიებაა დაგეგმილი .

დღე ტრადიციულად ოქონის ნიშთან დაიწყება, სადაც 09:00 საათიდან ოქონის ყოვლადწმიდა ღვთისმშობლის მიძინების სახელობის მშენებარე ტაძარში სამთავისისა და გორის მიტროპოლიტი ანდრია (გვაზავა) სადღესასწაულო წირვა-ლოცვას ჩაატარებს. წირვის შემდეგ მრევლი საზეიმო მსვლელობით ქალაქის ქუჩებს შემოივლის.

12:00 საათზე სერგი მაკალათიას სახელობის გორის სახელმწიფო ისტორიულ-ენთოგრაფიულ მუზეუმში გამოფენა მოეწყობა, სადაც წარმოდგენილი იქნება აღნიშნული მუზეუმის ექსპონატები და გორის ფოტოები.

15:00 საათზე გორის გიორგი ერისთავის სახელობის სახელმწიფო დრამატულ თეატრში სპექტაკლის - "დავა, გაყრა, ძუნწი, ანუ როგორც გენებოთ" ჩვენება გაიმართება.

"ოქონობის" დღესასწაულთან დაკავშირებით, დღის ბოლოს გორის მოსწავლე-ახალგაზრდობის კულტურულ-საგანმანათლებლო ცენტრის დარბაზში კონცერტი ჩატარდება. ღონისძიებაზე მუნიციპალიტეტის მიწვევით დუეტი "ჯორჯია" იმღერებს.

"ოქონობა" გორში წელს მეცხრედ აღინიშნება. დღესასწაული საუკუნეების წინ მივიწყებული ტრადიციაა, რომელიც სამთავისისა და გორის მიტროპოლიტ ანდრიას ლოცვა-კურთხევით აღდგა და გორელების საყვარელ დღესასწაულად იქცა. დღესასწაული ოქონის ხატს უკავშირდება, რომელიც მე-12 საუკუნიდან გორის მფარველად მიიჩნეოდა და თამარ მეფის მიერ აშენებულ ოქონის ღვთისმშობლის მიძინების საკათედრო ტაძარში იყო დაბრძანებული. ხატი ქართულ-ოსური კონფლიქტის დროს დაიკარგა და 2001 წელს კრისტის აუქციონზე აღმოაჩინეს. 2004 წლიდან კი ის ხელოვნების სახელმწიფო მუზეუმის ოქროს ფონდში ინახება.