VII საერთაშორისო ფესტივალი "აღდგომიდან ამაღლებამდე" სრულიად საქართველოს კატოლიკოს-პატრიარქის, უწმინდესისა და უნეტარესის ილია მეორის აღსაყდრებიდან 35-ე წლისთავს მიეძღვნება.

ფესტივალი "აღდგომიდან ამაღლებამდე" 2006 წელს სრულიად საქართველოს კათოლიკოს-პატრიარქის საერთაშორისო საქველმოქმედო ფონდმა მისი უწმინდესობის ლოცვა-კურთხევით დაარსა. ფესტივალის მუდმივი პარტნიორია თბილისის მერია.

წელს ფესტივალი მეშვიდედ იმართება და მისი სამხატვრო ხელმძღვანელი აშშ-ში მოღვაწე გამოჩენილი ქართველი პიანისტი ალექსანდრე კორსანტიაა.

ფესტივალი ტრადიციულად თბილისში, ბრწყინვალე შვიდეულის კვირაში, 18-22 აპრილს ჩატარდება.

კონცერტები გაიმართება თბილისის კონსერვატორიის დიდ დარბაზში.

თბილისის შემდეგ, საფესტივალო საღამოები გაგრძელდება სტეფანწმინდაში (2 მაისი), მარტვილში (20 მაისი), ქუთაისში (22 მაისი) ზუგდიდში, ხოლო დასკვნითი საღამო ტრადიციულად, ამაღლების დღესასწაულზე გაიმართება ბათუმში, სადაც 24 მაისს მუსიკალური ცენტრის ახალ საკონცერტო დარბაზში შედგება ცნობილი კომპოზიტორის, იოსებ ბარდანაშვილის შემოქმედებითი საღამო.

ფესტივალის თბილისის ნაწილის დასკვნით საღამოზე, კვირაცხოვლობის დღესასწაულზე შესრულდება სრულიად საქართველოს კათოლიკოს-პატრიარქის ახალი მუსიკალური ნაწარმოები “Agnus Dei”, რომელიც შექმნილია 2 სოლისტის, გუნდისა და ორკესტრისთვის.