დავეხმაროთ ორი წლის ლუკა ლომიძეს - ამ სახელწოდებით საქველმოქმედო აქცია-კონცერტი ხვალ “თბილისი არტ ჰოლში” გაიმართება.

პატარა ლუკას, რომლესაც ავთვისებიანი სიმსივნის დიაგნოზი დაუსვეს, საზღვარგარეთ სასწრაფო გადაუდებელი ოპერაცია ესაჭიროება. სტუდენტებმა და ახალგაზრდებმა უკვე შეძლეს მისთვის გარკვეული თანხის შეგროვება. კონცერტიდან შემოსული თანხაც მთლიანად პატარა ლუკას ოპერაციას მოხმარდება. აქცია-კონცერტში მონაწილეობას ყველასთვის საყვარელი და ცნობილი ქართული ესტრადის ვარსკვლავები და ფოლკლორული ანსამბლები მიიღებენ მონაწილეობას, მათ შორის - “ქართული ხმები”, ანსამბლი ,,გოგოჭურები,“ ქართული საბრძოლო ხელოვნების აკადემია, “ნიკოლშოუ” და სხვები.

აღსანიშნავია, რომ შემსრულებლები აქცია­-კონცერტში მონაწილეობას აბსოლუტურად უსასყიდლოდ და დიდი სიხარულით დათანხმდნენ. ისინი მაყურებელს ორსაათნახევრიან პროგრამას შესთავაზებენ. კონცერტი “თბილისი არტ ჰოლში” ხვალ 5 საათზე დაიწყება. ბილეთის ღირებულება 12 ლარია და დაინტერესებულ პირებს მათი შეძენა “არტ ჰოლის” სალაროში შეუძლიათ. საქველმოქმედო აქციის მონაწილენი პატარა ლუკას დასახმარებლად სხვადასხვა ღონისძიების მოწყობას კიდევ გეგმავენ.