დღეს ქრისტეშობის ბრწყინვალე დღესასწაულია, რასაც სიხარულით ელოდა მართლმადიდებელი მრევლი. საქართველოში შობას თან სდევს ალილოს უმნიშვნელოვანესი ტრადიცია.

საშობაო ალილო 7 იანვარს 14:00 საათზე ვარდების (ყოფილი რესპუბლიკის) მოედნიდან თეატრალიზებული მსვლელობით დაიწყება. გაივლის რუსთაველის გამზირს, თავისუფლების მოედანს, ბარათაშვილის ხიდს და ბოლოს სამების საკათედრო ტაძარში დასრულდება, სადაც საზეიმო პარაკლისი აღევლინება.

ალილოზე მოგროვილი სურსათ-სანოვაგე, მზრუნველობამოკლებულ, უნარშეზღუდულ ბავშვთა სახლებსა და მოხუცებულთა თავშესაფარში განაწილდება.

ალილო შობის დღესასწაულის ქართული ტრადიციაა. ის სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტის, უწმიდესისა და უნეტარესის ილია მეორის ლოცვა–კურთხევით უკვე მეთორმეტე წელია გრანდიოზული მსვლელობით აღინიშნება. მასში მონაწილეობა ნებისმიერ მსურველს შეუძლია.