29 ნოემბერს, საპატრიარქოში, სრულიად საქართველოს კათოლიკოს-პატრიარქმა ილია II სომხეთის პრეზიდენტი სერჟ სარგსიანი მიიღო.

შეხვედრის ნაწილი დახურულ კარს მიღმა მიმდინარეობდა. შეხვედრის დახურვამდე უწმინდესმა და სომხეთის პრეზიდენტმა ერთმანეთს სიტყვით მიმართეს. კათოლიკოს-პატრიარქმა აღნიშნა, რომ მოხარულია სომხეთის პრეზიდენტის საქართველოში ვიზიტით.

უწმინდესმა ისაუბრა ორი ქვეყნის ისტორიულ მეგობრობაზე და ქართული და სომხური ეკლესიების როლზე საკუთარი ერების წინაშე. პატრიარქმა აღნიშნა, რომ აფასებს ორი ერის ურთიერთობას და კულტურულ თანხვედრას.

"ძალიან ხშირად ჩვენი ურთიერთობების შურთ, მაგრამ ჩვენ აუცილებლად დავძლევთ ამ წინააღმდეგობას. ჩვენ გვაქვს საერთო ფასეულობები", - დასძინა სრულიად საქართველოს კათოლიკოს-პატრიარქმა. უწმინდესმა თავის მისასალმებელ სიტყვაში სრულიად სომხეთის კათოლიკოსი გარეგინ მეორეც მოიკითხა.

თავის მხრივ, სომხეთის პრეზიდენტმა სერჟ სარგსიანმა აღნიშნა, რომ სომეხ და ქართველ ერს ბევრი რამ აქვთ საერთო. მისი თქმით, საქართველომ და სომხეთმა თავისი არსებობის მანძილზე ძალიან რთული პერიოდები გამოიარეს. ხშირ შემთხვევაში ეკლესიებს სახელმწიფოს მისიის შესრულებაც უწევდავთ. "ჩვენ ვაფასებთ თქვენს პიროვნებას და უდიდესი მნიშვნელობა გაგაჩნიათ რთულ რეგიონში. თქვენ შეგიძლიათ დააახლოვოთ ამ რეგიონში არსებული ერები", - აღნიშნა სერჟ სარგსიანმა.