19 ნოემბერს სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინითისა და ცხუმ-აფხაზეთის მიტროპოლიტი, უწმინდესი და უნეტერესი ილია მეორე მოსკოვისა და სრულიად რუსეთის პატრიარქ კირილს შეხვდა. ამის შესახებ რუსეთის საპატრიარქოს ოფიციალური ვებგვერდი იუწყება.

პატრიარქების შეხვედრა მოსკოვის მაცხოვრის ტაძარში გაიმართა.

საქართველოს კათოლიკოს-პატრიარქი, უწმინდესი და უნეტარესი ილია მეორე მოსკოვში 18 ნოემბერს გაემგზავრა. უწმინდესთან ერთად დელეგაციაში იმყოფებიან წმინდა სინოდის წევრები და სხვა სასულიერო პირები. პატრიარქი მონაწილეობას მიიღებს მოსკოვისა და სრულიად რუსეთის პატრიარქ კირილის 65 წლის იუბილესადმი მიძღვნილ ღონისძიებებში.

გამგზავრების წინ უწმინდესმა ბრძანა, რომ მოსკოვში ვიზიტის დროს შეხვდება მოსკოველ ქართველებსა და აფხაზებს. 23 ნოემბერს კი მოსკოვის წმინდა გიორგის სახელობის ტაძარში წირვას აღავლენს.