3 ნოემბერს სამტრედიაში პირველი საკათედრო ტაძარი გაიხსნა. საზეიმო საღვთო ლიტურგია სრულიად საქართველოს კათლიკოს–პატრიარქმა მცხეთა–თბილისის მთავარეპისკოპოსმა და ბიჭვინთისა და ცხუ–აფხაზეთის მიტროპოლირმა უწმინდესმა და უნეტერესმა ილია მეორემ აღავლინა. წირვა–ლოცვის დაწყებამდე ეკლესია ხონისა და სამტრედიის მიტროპოლიტმა საბამ აკურთხა. პირველ საზეიმო ღვთისმსახურებას უამრავი ადამიანი დაესწრო. წმინდა მეფე დავით აღმაშენებლის სახელობის ტაძრის აგებას საფუძველი 1990 წელს ჩაეყარა, საძირკველი წლების წინ თავად კათოლიკოს–პატრიარქმა აკურთხა. ტაძრის აშენებაში მთელი ეპარქია აქტიურად მონაწილეობდა. ეკლესიის ასაგებად ქვები მთელი საქართველოდან ჩამჰქონდათ.

საღვთო ლიტურგიის დასრულების შემდეგ სრულიად საქართველოს კათოლიკოს–პატრირქმა უწმინდესმა და უნეტერესმა ილია მეორემ მრევლს დღევანდელი დღე მიულოცა. კათოლიკოს–პატრირქმა ხონისა და სამტრედიის ეპარქიაში მოღვაწე სასულიერო პირებიც დააჯილდოვა. ტაძრის კურთხევასთან ერთად მთელი ეპარქია კიდევ ერთ მნიშვნელოვან თარიღს ზეიმობდა - 1995 წელს, თითქმის ორასი წლის შემდეგ, კათოლიკოს–პატრიარქის ლოცვა–კურთხევით მეცხამეტე საუკუნეში გაუქმებული ხონისა და სამტრედიის ეპარქია აღსდგა.