ნატახტარში მსწრაფლშემსმენელი ყოვლადწმინდა ღვთისმშობლის სახელობის ტაძარი გაიხსნა. ეკლესია გარდაბნისა და მარტყოფის ეპისკოპოსმა იაკობმა აკურთხა. ახლადაგებული ტაძარი სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა ილია მეორემ წმინდა სინოდის წევრებთან ერთად მოილოცა.

მსწრაფლშემსმენელი ყოვლადწმინდა ღვთისმშობლის სახელობის ტაძარი უძველეს ნანგრევებზეა აგებული. კათოლიკოს-პატრიარქის ლოცვა-კურთხევითა და სამების საპატრიარქო ტაძრის წინამძღვრის მოადგილის არქიმანდრიტ ილია ნასიძის ძალისხმევით, ტერიტორია დასუფთავდა. გაწმენდითი სამუშაოების დასრულების შემდეგ ადრექრისტიანული ხანის ერთნავიანი ბაზილიკური ტიპით ნაგები ეკლესიის ნანგრევები და ამავე პერიოდის სამარხები აღმოაჩინეს. სპეციალისტების განცხადებით, ეს ისტორიული ადგილი საფუძვლიან შესწავლას საჭიროებს. ტაძრის სამშენებლო სამუშაოებში ადგილობრივებიც აქტიურად მონაწილეობდნენ. ახლადაგებული ტაძრის მიმდებარე ტერიტორიაზე სამონასტრო კომპლექსის მშენებლობა მიმდინარეობს.