უწმიდესმა და უნეტარესმა, ილია მეორემ კიკეთის წმიდა ექვთიმე ღვთისკაცის სახელობის ახლად ნაკურთხი ტაძარი მოილოცა და პარაკლისი გადაიხადა.

“ქართველი ადამიანი გარეშე მტრებისგან ტაძრებსა და მონასტრებს იცავდა, რადგან ქრისტიანული სარწმუნოება ჩვენი გადამრჩენია”,- აღნიშნა სრულიად კათოლიკოს-პატრიარქმა ქადაგებისას.

კიკეთში ახლად აშენებულ ტაძარს ორი ტრაპეზი აქვს, რომელიც წმიდა მოწამე პატრიარქი კირიონისა და წმ. ექვთიმე აღმსარებლის (კერესელიძე) სახელზე იკურთხა. ტაძრის კურთხევა და წირვა მიტროპოლიტმა შიომ (მუჯირი) აღავლინა.

პატრიარქის თქმით, ბედნიერია ის ადამიანი, რომელიც ტაძრის მშენებლობაში მონაწილეობს. მან დალოცა ტაძრის მშენებლობის დამფინანსებელი, ბიზნესმენი ლევან ვასაძე და მას წმიდა ნიკოლოზის ხატი, ტაძარს კი წმიდა სამების ხატი უსახსოვრა.

კიკეთის წმიდა ექვთიმე ღვთისკაცის სახელობის ტაძრის კურთხევას უამრავი მომლოცველი დაესწრო.