Check in Georgia-ს ფარგლებში 10-14 სექტემბერს საერთაშორისო ფოტოფესტივალი „ოდესა/ბათუმი ფოტოდღეები 2016“ გაიმართება. 

საქართველოს კულტურისა და ძეგლთა დაცვის სამინისტროს ცნობით, სამინისტროში დღეს საერთაშორისო ფოტოფესტივალ „ოდესა/ბათუმი ფოტოდღეები 2016“ - ისადმი მიძღვნილი პრესკონფერენცია გაიმართება.

ღონისძიებას საქართველოს კულტურისა და ძეგლთა დაცვის სამინისტროს კულტურის პოპულარიზაციისა და რეგიონალური პროგრამების დეპარტამენტის დირექტორი ანა რიაბოშენკო, ფოტოგრაფი ნათელა გრიგალაშვილი და ფესტივალის თანაორგანიზატორი მარიამ ბულაური დაესწრებიან. 

ფესტივალის ფარგლებში, წარდგენილი იქნება ირანული ფოტოგრაფია ღამის ჩვენების და ლექციის სახით, რომელსაც ცნობილი ირანელი ფოტოგრაფი ალი აკბარ შირჯიანი გამართავს. გარდა უცხოური სექციისა, ფესტივალის ფარგლებში გამოიფინება მე-19-20 საუკუნის ქართველი ფოტოგრაფის შალვა ალხანაიძის საოჯახო არქივი - „მოგონებები შუშაში“.