ეროვნული მუზეუმის შალვა ამირანაშვილის სახელობის ხელოვნების მუზეუმში დღეს გიორგი ჩალაძის 85 წლის იუბილესადმი მიძღვნილი გამოფენა გაიხსნება. 

გიორგი ჩალაძე რუსთაველი მხატვარი და მოქანდაკეა. ის არის რუსთავის მხატვართა გაერთიანების დამაარსებელი და ხელმძღვანელი, საქართველოს დამსახურებული მხატვარი, მინიჭებული აქვს ღირსების ორდენი.

გიორგი ჩალაძე თანამშრომლობს სხვადასხვა ქვეყნის კულტურულ დაწესებულებებთან, მოღვაწეობდა საბერძნეთში, სადაც შექმნა დიდი ზომის პანოები და გააფორმა სპექტაკლი სალონიკის თეატრში. მხატვარი აქტიურად მონაწილეობს ეროვნულ და საერთაშორისო გამოფენებში, არის სამი წიგნის ავტორი. 

მუზეუმის ინფორმაციით, გიორგი ჩალაძის ნამუშევრები დაცულია საქართველოში და საზღვარგარეთ. მისი პერსონალური გამოფენები წარმოდგენილი იყო საქართველოში (იოსებ გრიშაშვილის სახელობის თბილისის ისტორიის მუზეუმი), შვედეთში, საბერძნეთსა და გერმანიაში.

გამოფენა 2016 წლის 14 აგვისტომდე გაგრძელდება.