მხატვარი ანტონ ბალანჩივაძე საქართველოს პრემიერ-მინისტრ გიორგი კვირიკაშვილს ღია წერილით მიმართავს და საფრანგეთიდან გრიგოლ რობაქიძის გადმოსვენებას სთხოვს. 

”ბატონო გიორგი, პატივი მაქვს მოგმართოთ თხოვნით და მჯერა ამ თხოვნაში არა მარტო ჩემი პირადი, არამედ არაერთი ჩვენი თანამემამულის სურვილიც შეიძლება გამოიხატოს. 

ღრმად მწამს, რომ შეგიძლიათ ფასდაუდებელი საჩუქარი გაუკეთოთ ქართველ ხალხს, მომავალ თაობებს და ამით ძლიერმოქმედი ბიძგი მისცეთ ქვეყანაში ახალი, პროგრესული, საგანმანათლებლო ძალების დამკვიდრებას. 

საკითხი ეხება დიდი ქართველის, განსაკუთრებულად გამორჩეული პიროვნებისა და მწერლის, ქართული ენის რეფორმატორის, მოაზროვნის, საზოგადო მოღვაწის, თავისი სამშობლოს ერთგული შვილის - გრიგოლ რობაქიძის საფრანგეთიდან გადმოსვენებას და ამით მის საბოლოო რეაბილიტაციას. 

საქართველოს ფარგლებს გარეთ და მის შიგნით ამჟამად შექმნილი, ამ ფაქტისთვის უაღრესად ხელსაყრელი პირობები საფუძვლიან იმედს გვაძლევს ვიფიქროთ, რომ თქვენს მიერ პიროვნულად გამოვლენილი კეთილი ნების ჟესტი ამ საკითხის აღსრულების საწინდარი გახდება”, - ნათქვამია ღია წერილში. 

როგორც ბალანჩივაძე აღნიშნავს, ის რობაქიძესთან ნათესაურ კავშირში არ არის და აღნიშნულით არც ფინანსური დაინტერესება გააჩნია.

”თუ ამ ნაბიჯმა თავისი დადებითი შედეგი გამოიღო, ჩემთვის, როგორც მოქალაქისთვის, ეს თუნდაც სამომავლოდ, ახალი, ჭეშმარიტად პროგრესული სახელმწიფოს შენების შესაძლებლობის ნიშანი გახდება, თქვენ კი ის კეთილი ნების ადამიანი, რომელმაც ღირსეული საქმით, კვლავ დააბრუნა მზის ერთი სხივი ჩვენს ქვეყანაში, რომელიც ანათებს გრიგოლ რობაქიძის გამორჩეული პიროვნებისა და შემოქმედებიდან”, - ნათქვამია ღია წერილში.