საქართველოს პრემიერ-მინისტრი ირაკლი ღარიბაშვილი საქართველოს კათოლიკოს-პატრიარქის ინიციატივას "ყოველთა ქართველთა კონგრესის" ჩატარებასთან დაკავშირებით მიესალმება. 

როგორც პრემიერ-მინისტრის განცხადებაშია ნათქვამი, ეს არის შესანიშნავი იდეა.

"მივესალმები საქართველოს კათოლიკოს-პატრიარქის ინიციატივას "ყოველთა ქართველთა კონგრესის" ჩატარებასთან დაკავშირებით. ეს არის შესანიშნავი იდეა, რომლის განხორციელებაც საშუალებას მოგვცემს მთელი მსოფლიოს მასშტაბით ქართველთა ყველანაირი რესურსის გაერთიანება და კონსოლიდაცია მოვახდინოთ. 

გამოვთქვამ სრულ მზადყოფნას მაქსიმალურად შევუწყო ხელი კონგრესის ჩატარებას. დარწმუნებული ვარ, ასეთი კონსოლიდაცია ხელს შეუწყობს ქართველი ერის გაერთიანებას და ქართული სახელმწიფოს გაძლიერებას", - ნათქვამია პრემიერის განაცხადებაში. 

სრულიად საქართველოს კათოლიკოს-პატრიარქი სვეტიცხოვლობას ყოველთა ქართველთა კონგრესის ჩატარების ინიციატივით გამოდის. ეს ინიციატივა მისმა უწმინდესობამ დღევანდელი საკვირაო ქადაგებისას გააჟღერა, სადაც უცხოეთში მყოფ ქართველებზე ისაუბრა და მათი აღრიცხვის სურვილი გამოთქვა.