30 ნოემბერს საკვირაო წირვის დასრულების შემდეგ სამების საკათედრო ტაძარში მრევლს ქადაგებით მიმართა უწმიდესმა და უნეტარესმა ილია მეორემ და ძალადობის დაძლევის გზებსა და განათლების აუცილებლობაზე ისაუბრა. მან განათლებასთან ერთად სულიერი სამყაროს გაძლიერებას გაუსვა ხაზი.

“ძველმა რომაელებმა თქვეს: დრონი იცვლებიან და ჩვენც ვიცვლებით მასთან ერთად. როგორ იცვლება კაცობრიობა, როგორ იცვლება ბუნება, როგორ იცვლება ჩვენ გარშემო სამყარო…. ყველაფერი ძალიან რთული პროცესია და ჩვენ ძალიან ხშირად ვფიქრობთ, რით არის ეს პროცესი გამოწვეული. ყველაზე რთული პროცესი ადამიანში მიმდინარეობს.

ბოლო დროს ხელისუფლება, საზოგადოება, ეკლესია შეწუხებულია ადამიანთა ძალადობით, რომელიც ადამიანთა შორის და ოჯახებში ხდება. ჩვენ უნდა ვიფიქროთ, რით არის გამოწვეული ეს ყველაფერი. შემიძლია თამამად ვთქვა, რომ ეს ურწმუნოებით არის გამოწვეული, შინაგანი პროცესით. როდესაც ჩვენ ახალგაზრდებს ვეუბნებით, რომ არ შეიძლება ბოროტმოქმედება, ძალადობა, ეს საკმარისი არ არის. უნდა ვიფიქროთ შინაგან, სულიერ სამყაროზე. ბოროტება ტრიალებს ადამიანის სულსა და გონებაში და ეს შემდეგ ადამიანებს შორის ხორციელდება. ყურადღება უნდა მივაქციოთ შვილების სულიერ სამყაროს. შვილებს ყველაფერს ვაძლევთ – განათლებას, საჭმელ-სასმელს და ჩასაცმელს, ვასწავლით ენებს და ხელობას, ვამთავრებინებთ უმაღლეს სასწავლებლებს და იმას არ ვფიქრობთ, რომ ჭეშმარიტი სარწმუნოება ვასწავლოთ, რა არის კეთილი და ბოროტი, რა შედეგები აქვს სიკეთეს და რა – ბოროტებას. ამით შეგვიძლია დავძლიოთ ბოროტება და ძალადობა. სამწუხაროა, რომ დღეს აღარ ესმის შვილებს მშობლებისა და მშობლებს შვილებისა. სულ სხვადასხვა აზროვნებისანი არიან და ეს ყველაფერი გამოწვეულია დაბალი სულიერებით”, – ბრძანა უწმიდესმა.

ილია მეორის თქმით, სარწმუნოება აკეთილშობილებს ადამიანს. მან ოჯახში ქალისა და კაცის ურთიერთობაზეც იქადაგა და აღნიშნა, რომ მთავარი ამ ურთიერთობაში არა თანასწორობა, არამედ ურთიერთპატივისცემაა.

“ძალიან ხშირია შემთხვევა, როდესაც მამაკაცი ძალადობს ქალზე ან ცოლი ძალადობს ქმარზე. ძალიან ხშირად გვესმის, რომ საჭიროა თანასწორობა ქმარსა და ცოლს შორის. არ შეიძლება ასე მსჯელობა. თანასწორობა კი არა, დიდი პატივისცემა უნდა ჰქონდეს ცოლს. უნდა სარგებლობდეს ამ პატივისცემით ქმრის წინაშე. და ეს ქალის ავტორიტეტი მუდამ მაღალი იყო საქართველოში და ეს უნდა შევინარჩუნოთ. ყველაფერი უნდა გავაკეთოთ, რომ ქალმა, დედამ დაიკავოს თავისი მაღალი წოდება და მაღალი ადგილი”, – აღნიშნა პატრიარქმა.

ქადაგების შემდედ პატრიარქმა კოტე მახარაძის საფეხბურთო კლუბი “ალგეთი XXI” და საქართველოს დაზვერვის სამსახური დალოცა.