სვეტიცხოვლის ტაძარში ხარების დღესასწაულზე დაბრძანებულ სამ ჯვარს მომავალ კვირას, ანუ აღდგომიდან მესამე კვირას სამი მიმართულებით გადააბრძანებენ. როგორც დეკანოზმა ბესარიონ მენაბდემ სამების საკათედრო ტაძარში განაცხადა, ერთ ჯვარს მცხეთის ჯვარზე ააბრძანებენ, მეორეს - თხოთის მთაზე არსებულ ტაძარში, მესამეს კი - უჯარმაში არსებულ ტაძარში.

მისივე თქმით, იქ შარშან გადაბრძანებული სამი ჯვარი, რომლებმაც ეს წმინდა გზა გაიარეს, პატრიარქის კურთხევით, სამ სხვადასხვა რეგიონში გადაბრძანდება, კერძოდ, ჯვრის მონასტრიდან ჯვარი ბოდბეში წაბრძანდება, თხოთის მთიდან – მესტიაში, უჯარმიდან კი - ახალგორში, იკოთის დედათა მონასტერში. "და ეს ასე გაგრძელდება, სანამ მთელი საქართველო არ იქნება მოცული ამ წმინდა ჯვრებით", - აღნიშნა დეკანოზმა ბესარიონ მენაბდემ.