სრულიად საქართველოს კათოლიკოს-პატრიარქის ინიციატივით საქართველოს გამწვანების ფონდი იქმნება.

საპატრიარქოში გამართულ შეხვედრას, რომელიც ქვეყანაში ეკოლოგიური პრობლემების აღმოფხვრის მიზნით ტყე-პარკების შექმნას, მათ მოვლასა და განვითარების საკითხებს ეხებოდა, მინისტრები: დავით სერგეენკო, ხათუნა გოგალაძე, თამარ სანიკიძე, პარლამენტის წევრები და მერიის წარმომადგენლები ესწრებოდნენ.

ფონდს, რომელსაც პირველ შესატანს, 50 000 დოლარს უწმიდესი შეწირავს, თავად პატრიარქი უხელმძღვანელებს. ფონდის თავმჯდომარის მოადგილეობაზე სურვილი შეხვედრაზე მყოფმა მინისტრებმა გამოთქვეს, მდივნის ვინაობა კი 1 კვირაში გახდება ცნობილი.

შეხვედრაზე ითქვა, რომ უნდა განისაზღვროს ტერიტორიები, სადაც ხეების დარგვა, მათი წვეთოვანი სისტემით მორწყვა და მეთვალყურეობა მოხდება. ასევე უნდა მოხდეს ამ მიზნით სანერგეებში ნერგების გამოყვანა, დარგვის პროცესში კი მონაწილეობას მიიღებენ მოსწავლეები, რომლებსაც ყოველ გახარებულ ერთ ხეზე 50 თეთრს გადაუხდიან.