ყოვლადწმინდა სამების საკათედრო ტაძარში 22 სექტემბერს 31-ე საყოველთაო ნათლობა გაიმართება. სრულიად საქართველოს კათოლიკოს-პატრიარქის ნათლული კიდევ 734 ჩვილი გახდება. პატარები ღვთისმშობლის მშობლების წმ. იოაკიმესა და ანას ხსენების დღეს მოინათლებიან. მონათლულებს საჩუქრად ნათლობის მოწმობა, სახარება, სანთლები და ჯვარი გადაეცემათ.

ნათლობის დასრულების შემდეგ, დაახლოებით 20.00 საათისთვის, ტაძარში პატრიარქი მიბრძანდება და მონათლულებს დალოცავს.

დღეისთვის სრულიად საქართველოს კათოლიკოს-პატრიარქს 17 687 ნათლული ჰყავს. ისინი ჯვარდაწერილი წყვილების ოჯახში მესამე და შემდეგი შვილები არიან. 30-ე საყოველთაო ნათლობა მიმდინარე წლის 14 ივლისს გაიმართა. ჩვილთა პირველი საყოველთაო ნათლობა კი ყოვლადწმინდა სამების საპატრიარქო ტაძარში 2008 წლის 19 იანვარს შედგა.

კათოლიკოს-პატრიარქის ინიციატივის მიზანი ქვეყანაში დემოგრაფიული მდგომარეობის გაუმჯობესებაა.