13 ივლისს ყოვლადწმინდა სამების სახელობის საპატრიარქო ტაძარში რიგით ოცდამესამე საყოველთაო ნათლობა შედგა. სრულიად საქართველოს კათოლიკოს-პატრიარქის, მცხეთა თბილისის მთავარეპისკოპოსის და ბიჭვინთისა და ცხუმ-აფხაზეთის მიტროპოლიტის უწმინდესისა და უნეტარესის ილია მეორის ნათლული კიდევ 511 პატარა გახდა. საქართველოს ეკლესიის მეთაური უკვე 11907-მდე ბავშვის ნათლიაა. კათოლიკოს-პატრიარქის ნათლულები ჯვარდაწერილი ოჯახების მე-3 და მომდევნო შვილები არიან. საქართველოს ეკლესიის მეთაურის განჩინებით, ყოველი ოჯახის მეოთხე შვილს, რომელიც უწმინდესისა და უნეტარესის ნათლული გახდა, სამშობლოსთვის თავდადებული მამულიშვილისა და საქართველოს ეკლესიის საპატრიარქო ტახტის მცველის ტიტული ენიჭება. ნათლობის დასრულების შემდეგ კათოლიკოს-პატრიარქმა თითოეულ ახლადმონათლი დალოცა. ჩვილთა პირველი საყოველთაო ნათლობა სამების საპატრიარქო ტაძარში 2008 წლის 19 იანვარს შედგა.