ბაგრატის ტაძარი მსოფლიო მემკვიდრეობის იუნესკოს სიაში რჩება. ეს ინფორმაცია იუნესკოს კომიტეტმა 26 ივნისს გამართულ რიგით 36– ე სესიაზე დაადასტურა. ბაგრატის ტაძრისა და გელათის მონასტრის კონსერვაციის მდგომარეობის საკითხი 2013 წელს კომიტეტის 37– ე სხდომაზეც განიხილება. ტაძრის რეკონსტრუქციის სრული პროექტი იუნესკოს 36-ე სესიაზე კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ვაჩეიშვილმა და ეროვნული სააგენტოს იუნესკოსთან ურთიერთობის სამსახურის წარმომადგენლებმა წარადგინეს. სხდომის მონაწილეებს ქართულმა მხარემ ბაგრატის ტაძრის საინფორმაციო ბროშურაც გააცნო, რომელიც ტაძრის აღდგენა-რეკონსტრუქციის მიმდინარეობასთან ერთად, მის მრავალსაუკუნოვან ისტორიასაც ასახავს.