24 ივნისი ახალგაზრდობის დღედ დაწესდა. სრულიად საქართველოს კათოლიკოს-პატრიარქი, უწმინდესი და უნეტარესი ილია II ხვალ, წირვის დასრულების შემდეგ, ახალგაზრდულ მოძრაობა "დავითიანნს" დალოცავს და "ახალგაზრდობის დღეს" ოფიციალურად აკურთხებს.

ამ მიზნით "დავითიანნის" წევრები და საქართველოს სხვადასხვა კუთხიდან ჩამოსული ახალგაზრდები ხვალ, 10:00 საათიდან, სამების ახალგაზრდულ ცენტრში შეიკრიბებიან. შემდეგ სამების ტაძარში პატრიარქის წირვას დაესწრებიან.

ამასთან, 20:00 საათზე, "მთაწმინდის პარკში", ქართველი შემსრულებლების მონაწილეობით კონცერტი გაიმართება.

ახალგაზრდულ ცენტრში აცხადებენ, რომ "ახალგაზრდობის დღედ" ივნისის ბოლო კვირა შეირჩა, როდესაც სასწავლებლებში სწავლა დასრულებულია. კვირის განმავლობაში "ახალგაზრდობის დღისადმი" მიძღვნილი კულტურული ღონისძიებები გაიმართება.

სრულიად საქართველოს კათოლიკოს-პატრიარქმა "ახალგაზრდობის დღის" დაწესების შესახებ გასულ კვირას, საკვირაო ქადაგებისას განაცხადა.