სრულიად საქართველოს კათოლიკოს-პატრიარქმა პროექტის - "ვაჩუქოთ ერთმანეთს სიყვარული" მონაწილე მოსწავლეები, მშობლები და პედაგოგები დალოცა. უწმინდესმა დღევანდელ საკვირაო ქადაგებაში ისურვა, რომ უფალმა ყველა ბავშვის გული სიყვარულით აავსოს.

"ძალიან კარგი პროექტია - "ვაჩუქოთ ერთმანეთს სიყვარული". ბავშვის გულმა იგრძნო, რომ სიყვარულის გარეშე ვერაფერი გამოგვივა. ღმერთმა დალოცოს ჩვენი ბავშვები და სიყვარულით აღავსოს მათი გულები", - ბრძანა უწმინდესმა.

ყოველკვირეული პროექტი – "ვაჩუქოთ ერთმანეთს სიყვარული", სრულიად საქართველოს კათოლიკოს-პატრიარქის საერთაშორისო ფონდისა და საქართველოს კულტურის ხელშეწყობისა და განვითარების ფონდის ორგანიზებით რამდენიმე წელია ხორციელდება და მასში თბილისის სხვადასხვა საჯარო სკოლის უმცროსკლასელები მონაწილეობენ.

როგორც ჟურნალისტებს სრულიად საქართველოს კათოლიკოს-პატრიარქის საერთაშორისო ფონდის ხელმძღვანელმა, ლაშა ჟვანიამ განუცხადა, პროექტის ფარგლებში სკოლის მოსწავლეები პატრიარქის კურთხევით ქმნიან ნახატებს, თემაზე "ჩემი იდეალი".

"ბავშვების მიერ შექმნილი ნამუშევრები გამოიფინება პატრიარქის ფონდის ოფისში და ეწყობა საქველმოქმედო გამოფენა-გაყიდვა. ბავშვების ნახატებს სიმბოლურ ფასად ყიდულობენ მათი მშობლები, პედაგოგები, მიწვეული სტუმრები. შედეგად, პროექტის ფარგლებში ჩვენ ვიღებთ საქველმოქმედო აქციას, რომელშიც ჩართულია საზოგადოების სამი მნიშვნელოვანი რგოლი - ოჯახი, სკოლა და ეკლესია. შემოსული თანხა სხვადასხვა საქველმოქმედო პროექტებს ხმარდება. თუმცა, პროექტის მატერიალურ მნიშვნელობაზე მეტად ღირებულია პასუხისმგებლობის გრძნობა, რომელიც ბავშვებს თანატოლების მიმართ უჩნდებათ", - აღნიშნა ლაშა ჟვანიამ. მისივე განმარტებით, პროექტი გრძელდება და ახალი სასწავლო წლიდან განახლდება.

საქართველოს კათოლიკოს-პატრიარქის საერთაშორისო საქველმოქმედო ფონდის ხელმძღვანელმა ყველა სკოლას პროექტში ჩართვისკენ მოუწოდა. 2011-2012 წელს პროექტში მონაწილეობა თბილისის 16-მა საჯარო და კერძო სკოლამ მიიღო.