ყოვლადწმინდა სამების საკათედრო ტაძარში წმინდა ნინოს საქართველოში შემოსვლის დღესთან დაკავშირებით სადღესასწაულო წირვა დასრულდა, რომლის შემდეგაც სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ მრევლს ქადაგებით მიმართა.

პატრიარქმა ბრძანა, რომ წმინდა ნინომ ძალიან ახალგაზრდამ მიიღო გადაწყვეტილება,  ჩამოსულიყო საქართველოში, სადაც უფლის კვართი იყო და ეს ღვთის განგებით მოხდა. უწმინდესმა ბრძანა, რომ წმინდა ნინომ სასწაულებრივად მოაქცია საქართველო.

შემდეგ პატრიარქმა ადამიანის უძლურებაზე ისაუბრა. "არ მეგულება ისეთი ახალგაზრდა, რომელიც წავა შორეულ ქვეყანაში საქადაგოდ. ეს იმას ნიშნავს, რომ დაუძლურდა კაცობრიობა, ადამიანი. ახალგაზრდები გატაცებულნი არიან გართობით", - ბრძანა ქადაგებისას უწმინდესმა.

კათოლიკოს-პატრიარქმა ასევე აღნიშნა, რომ ადამიანი უძლურია, მაგრამ მაინც რჩება ხატად უფლისა.

უწმინდესმა ასევე სულთმოფენობის დღესასწაულზე იქადაგა. უწმინდესმა ბრძანა, რომ კვირას სამებობაა, სამების ტაძრის დღესასწაული. ამ დღეს ტაძრის ეზოში მრევლისთვის სუფრა გაიშლება.

ტაძარში დაბრძანებული იყო წმინდა ნინოს ვაზის ჯვარი, რომელიც ღვთისმშობელმა უბოძა წმინდა ნინოს საქართველოში საქადაგებლად. წმიდა ნინოს ვაზის ჯვარი მსახურების დასრულების შემდეგ სიონის საპატრიარქო ტაძარში გადააბრძანეს.